මැයි 31 වන දින, නෙදර්ලන්තයේ හේග් නගරයේදී පැවැත්වුනු ජගත් යුක්ති සමුළුව 2022 දී ශ්‍රී ලංකාවේ ජාතික සමථකරණ වැඩසටහන නියෝජනය කළ පිරිස, "යුක්තිය සඳහා මාර්ග: දේශීයකරණය වූ ප්‍රජා විසඳුම් සඳහා ඵලදායී මෙවලම්" යන තේමාව යටතේ ක්‍රියාකාරී සැසිවාරයකට සහභාගී වූහ. මෙම සැසියේදී සමථ මණ්ඩල කොමිෂන් සභාවේ සමථකරණ පුහුණු නිලධාරීන් දෙදෙනෙකු සහ ස්වේච්ඡා සමථකරුවන් දෙදෙනෙකු ශ්‍රී ලංකාවේ සමථකරණය විවිධ පැතිකඩ ක්‍රියාත්මක වන ආකාරය පිළිබඳව සාකච්ඡා කළහ. එය ක්‍ෂේත්‍රයේ ප්‍රවීණයන් ලෙස ඔවුන්ගේ දැනුම, කථාන්දර සහ අත්දැකීම් තුලින් ලද සූක්ෂම ඥානය බෙදාගත් උද්වේගකර සැසියක් විය.
නෙදර්ලන්තයේ හේග් නගරයේදී පැවැත්වුනු ජගත් යුක්ති සමුළුව 2022 මතකයේ රැඳෙන වැඩසටහනක් විය. ශ්‍රී ලංකාවෙන් පැමිණි නියෝජිත පිරිසට ශ්‍රී ලංකාවේ සමථකරණය පිළිබඳ ඔවුන්ගේම අත්දැකීම් බෙදා ගැනීමට අවස්ථාවක් ලැබුණා පමණක් නොව, කණ්ඩායම කියා නිමකළ නොහැකි ක්‍රියාකාරී සැසිවාර ගණනාවක කොටසක් ද විය. නීති ප්‍රතිසංස්කරණයේදී යුක්තිය පිළිබඳ මහජන අවශ්‍යතා කේන්ද්‍රගත කරන අයුරු, ප්‍රජා යුක්තිය, අධිකරණ ක්‍රියා පටිපාටි ඩිජිටල්කරණය, සහ සාධාරණ ප්‍රතිපත්ති ස්ථාපිත කිරීම යන්නෙන් සැබෑ ලෙස අදහස් කරන්නේ කුමක්ද යන තේමාවන් මතවූ සැසිවාර මෙහිදී දැකගත හැකිවිය. මෙහිදී ශ්‍රී ලංකාවෙන් පැමිණි නියෝජිත පිරිස යුක්තිය සඳහා ප්‍රවේශය ගැන දැඩි උනන්දුවක් දක්වන යුක්තිය පිළිබඳ වෘත්තිකයන් මෙන්ම ප්‍රතිසංස්කරණ මානසිකත්වයෙන් කටයුතු කරන අධිකරණ නිලධාරීන් ද හමුවූහ.
